Павлодар қаласында волейболдан ерлердің Ұлттық лига командалары арасында ХХХІІ Қазақстан чемпионатының плей-офф бәсекелері басталды.
Алғашқы болып алаңға Алексей Теренин жаттықтыратын «Есіл» (СҚО) мен «Буревестник» (бас бапкері Александр Стольников) командалары шықты.
Өте тартысты өткен ойында солтүстікқазақстандықтар 3:2 (25:22, 24:26, 18:25, 25:15, 15:10) есебімен жеңіске жетіп, жартылай финалға жолдама алды.
Сондай-ақ бүгін «Жайық» (Орал) пен «Атырау» командалары тағы бір жартылай финал жолдамасын сарапқа салды.
«Жайықтың» бас бапкері Виктор Козик бастапқы құрамда мына ойыншыларға сенім артты: Виталий Вориводин (команда капитаны), Владимир Прокофьев, Айдын Әділбеков, Виталий Васильев (Ресей), Сергей Костив, байланыстырушы Ярослав Остраховский және либеролар Қайрат Байбеков, Дмитрий Сергеев.
«Атыраудың» жаттықтырушысы Юрий Лабецкий Бекарыс Ғабитұлы (команда капитаны), Айбол Өтегенов (байланыстырушы, Төлеби Әлімбек, Орал волейболының түлегі Петр Чурзин, Нұрасыл Жамбылов, Федор Сухацкий, либеро Аян Әлімхановты шығарды.
Бірінші партияда оралдықтар айқын басымдылық көрсетті – 25:18.
Екінші сет барысында В.Козиктің шәкірттері 6 ұпай айырмашылығымен озық тұрғанымен, атыраулықтар таразы басын теңестіре алды – 14:14. Содан кейін өздері алға шықты – 19:17. Дегенмен «Жайық» ұзаққа созылған текетіресті өз пайдасына аяқтады – 36:34.
Тартысты өткен үшінші кезеңде атыраулықтар қарымта қайырды – 32:30. Бұдан кейін «Атырау» өз мүмкіндіктерін толық пайдалана білді – 26:24, 15:8. Әсіресе, «Атырау» сапында ресейлік Ф.Сухацкий нәтижелі шабуылымен көзге түсті. Пәкстандық Афак Хан тың леп қоса білді. Өзінің туған күнінде либеро А.Әлімханов та сәтті ойнады.
Осылайша, «Жайық» фаворит саналғанымен, плей-офф бәсекесінде «Атырау» ұтып кетті.
«Есіл» жартылай финалда «Павлодар» — «Жетісу жастары» (Талдықорған), «Атырау» «Тараз» — «Ақтөбе» матчының жеңімпазымен кездеседі.