Атырау облысында кешеден бері шаңды дауыл соғып тұр. Дауылдың қашан басылары белгісіз, деп хабарлайды ҚазАқпарат тілшісі.
Облыстық төтенше жағдайлар департаментінің қоғаммен байланыс тобынан мәлім еткендей, бүгін, 13 сәуірде жел екпіні үдейді.
«Атырау облысында «Қазгидромет» РМК филиалының мәліметіне сәйкес желдің ұйытқуы секундына 17-22 метрге жетеді. Кей жерлерде секундына 25 метрге жетуі мүмкін. Шаңды дауыл соғады», — деп хабарлады ққоғаммен байланыс тобы.
Қазір жел екпіні де, шаңды дауыл да күшейіп тұр. Атырау облысында мұндай шаңды дауыл бұған дейін бірнеше рет болған. Мұнайлы өңір тұрғындары табиғаттың бұл құбылысын қалыпты жағдай ретінде қабылдайды.