Атырауда «Теңізшевройл» компаниясының құрылғанына 30 жыл толуына орай салтанатты жиын өтті. Оған облыс әкімі Серік Шәпкенов, Энергетика министрі Алмасадам Сәтқалиев, ТШО серіктестері, мұнай-газ саласының ардагерлері қатысты.
Шарада сөз сөйлеген Серік Шәпкенов «Теңізшевройл» компаниясын өңірге алғаш ірі инвестиция жасап, еліміздің экономикалық дамуына табысты үлес қосып келе жатқан жетекші компания екенін атап өтті.
— Қазақстан Республикасының егемендігімен тұспа-тұс құрылған ең алғашқы қазақ-американдық бірлескен «Теңізшевройл» кәсіпорны қазақ елінің мұнай әлеуетін дамытуда әлемдік қауымдастықтың көзін айтарлықтай дәрежеге жеткізді. 1993 жылдан бері компания елімізге 70 млрд АҚШ долларынан астам инвестиция тартып, мемлекет бюджетіне 160 млрд АҚШ долларынан астам кіріс кірген болатын. Компания тек қара алтынды ғана өндіріп қоймай, түрлі жобаларды іске асырды. Әрине, әлемдегі ең үздік технологиямен жұмыс істейтін өндіріс орнының білікті кадрларды дайындауда да үлесі мол. Төртінші он жылдықта мұнай-газ көлемін одан әрі арттырудың ауқымды жоспары енгелі отыр. Ендеше, осынау мерейлі күнде «Теңізшевройл» ЖШС ұжымына шын жүректен алғысымды білдіре отырып, Қазақстанның мұнай саласын дамыту ісінде жетістікке жетулеріңізге тілекшімін,-деді С.Шәпкенов.
«Теңізшевройл» ЖШС-нің Бас директоры Кевин Лайон кәсіпорын ұжымына, серіктестеріне алғысын білдірді.
— ТШО компаниясы 30 жылдан бері Атырау өңіріне әлеуметтік қолдау көрсетіп келді. Бұл ҚР Үкіметінің, Атырау облысы әкімдігінің, «Шеврон» корпорациясының, «ҚазМұнайГаз» ҰК» АҚ-ның, «ЭксонМобил Қазақстан Венчурс Инк.» және «Лукойл» компаниясының талантты да өз-өзіне берілген қызметкерлерінің қолдауынсыз мүмкін болмас еді. Сонымен қатар ТШО ардагерлеріне бүгінде бізбен бірге болғанына және ұрпақтың болашағына салған сара жолына құрмет көрсетеміз,-деді К.Лайон.
Салтанатты жиында «Еңбек ардагері» медалімен мұнай-газ саласының ардагерлері Болат Ерниязов, Мұхит Әбілғазиев және ТШО өндірісін пайдалану бөлімінің пульт операторы Теңелбай Жексенбаев марапатталды.
Сондай-ақ бірқатар азаматқа Қазақстан Республикасы Энергетика министрлігінің «Мұнай-газ кешенін дамытуға үлес қосқаны үшін» медалі, ТШО Серіктестік Кеңесінің медалі және «Құрмет» грамотасы, «KAZENERGY» компаниясының, Қазақстан Республикасы Энергетика министрлігінің «Құрмет» грамотасы, ТШО мерейтойлық медалі табыс етілді.
Еліміздегі жалпы мұнайдың үштен бірін «Теңізшевройл» компаниясы өндіреді. Кәсіпорын экономиканың машина жасау, мұнай-газ саласында қызмет көрсету, көлік және құрылыс салаларындағы мыңдаған қазақстандық кәсіпорынның қалыптасуына үлесін қосып келеді.
«Теңізшевройл» компаниясы 30 жылдың ішінде 100-ден астам әлеуметтік жобаны іске асырды. ТШО Атырау облысының қоғамдастықтарына инвестициялау екі ерікті бағдарлама арқылы жүзеге асырып келеді: «Игілік» әлеуметтік-инфрақұрылымдық бағдарламасы мен Әлеуметтік инвестициялар бағдарламасы (ӘИБ). Оның ішінде: мектептер, балабақшалар, ауруханалар және басқа да жалпыға ортақ жобалар бар.
Жалпы 1993 жылдан бастап ТШО Атырау облысының халқы мен қызметкерлеріне арналған әлеуметтік жобалар мен бағдарламаларға 2.7 млрд АҚШ долларынан астам қаражат бөлді.