Атырау облысында жасөспірімнің өліміне себепкер болған қарт жүргізуші сотталды. Бұл туралы Қазақпарат жазды.
Жылыой аудандық сотында жасөспірімді қағып, мерт қылған 73 жастағы жүргізушіге қатысты қылмыстық іс қаралды. Жүргізуші ҚР Қылмыстық кодексінің 345-бабының 3-бөлігімен айыпталған.
«Өткен жылғы 20 қазанда сағат 7.40 шамасында жүргізуші кәмелетке толмаған жаяу жүргіншіні қағып кеткен. Жол-көлік оқиғасынан жасөспірім оқиға орнында қайтыс болған. Сотталушының кінәсі сот-сараптама қорытындысымен, жол-көлік оқиғасы орнының бейнежазбасымен толық дәлелін тапты», — деп хабарлады аудандық соттың баспасөз қызметі.
Прокурор сотталушыға 5 жыл мерзімге көлік құралдарын басқару құқығынан, 2 жыл мерзімге бас бостандығынан айыру жазасын тағайындауды сұраған. Сотталушы өз кінәсін толық мойындаған.
«Сот жаза тағайындау барысында айыпталушының қылмыстық жауаптылығы мен жазасын жеңілдететін мән-жайлар ретінде оның бұрын сотты болмағанын, 73 жаста екенін, денсаулық жағдайын, жәбірленуші тарапқа келтірілген материалдық залалдың өтелгенін ескерді. Жүргізуші сот үкімімен ҚР Қылмыстық кодексінің 345-бабының 3-бөлігімен кінәлі деп танылып, оған 3 жыл мерзімге көлік құралдарын басқару құқығынан, 2 жыл 6 ай мерзімге бас бостандығынан айыру жазасы тағайындалды. Аталған құжаттың 63-бабының негізінде 2 жыл 6 ай мерзімге шартты жазаға сотталды», — деп мәлім етті соттың баспасөз қызметінен.
Сотталушыдан жәбірленуші тараптың пайдасына 5 млн теңге моральдық зиян өтемақысы өндірілген.
Сот үкімі заңды күшіне енген жоқ.