Атырау облысы әкімі аппаратының “Өңірлік коммуникациялар қызметінде” өткен брифингте облыстық Білім беру басқармасы басшысының орынбасары Орынтай Биманова өңірде «Мектепке жол» республикалық акциясының ұйымдастырылу барысы жөнінде баяндады. Бұл туралы AtyrauPress тілшісі жазды.
Акция мектеп оқушыларын жалпыға бірдей міндетті біліммен қамтамасыз ету мақсатында өткізіледі. Қазақстан Республикасының әрбір азаматы халықтың әлеуметтік осал топтарынан шыққан балаларды мектепке дайындауда атаулы көмек көрсетуде азаматтық белсенділік таныта алады, әрбір балаға шынайы қамқорлық пен назар аудара алады.
Мақсаты – аз қамтылған және көп балалы отбасылардан шыққан оқушыларға, жетім балаларға, сондай-ақ ата-анасының қамқорлығынсыз қалған балаларға оқу жылының басталуына дайындық кезінде материалдық қолдау көрсету және әлеуметтік себептер бойынша балалардың мектепке келмеуінің алдын алу.
Акция ағымдағы жылдың 1 тамызынан бастап, 30 қыркүйекке дейін жалғасады. Қазір білім беру басқармасымен 2024-2025 жаңа оқу жылына дайындық шеңберінде «Шекарасыз жақсылық» ұранымен дәстүрлі «Мектепке жол» акциясы аясында тиісті жұмыстар жүргізілуде.
Облыста әлеуметтік осал топ санатындағы 18 720 бала бар.