ҚР ҰЭМ Кәсіпкерлікті қолдау департаментінің директоры Нұрбол Жаңабеков атыраулық кәсіпкерлерге бизнесті қолдаудың мемлекеттік бағдарламаларына енгізілетін өзгерістер туралы айтты.
Нұрбол Жаңабековтің айтуынша, «Бизнестің жол картасы» және «Қарапайым заттар экономикасы» бағдарламаларын біріктіру арқылы жыл басынан бері кәсіпкерлікті қолдаудың жаңа кешенді бағдарламасы қабылданды.
-Мұнда шағын бизнесті толғандыратын басты жаңалық — 5 млн теңгеге дейінгі гранттар. Біз үлкен талдау жасадық және бұл гранттар өздерінің тиімсіздігін көрсетті. Мысалы, мен Атырауда кәсіпкерлік басқармасын басқарған кезде, 2022 жылы 600 кәсіпкер 5 млн теңгеге дейін грант алуға өтінім берді, оның 37-сі ғана алды. Алмағандар тарапынан үлкен наразылық болды. Өйткені олар конкурсқа дайындық кезінде көп мөлшерде қаржы жұмсайды, бірақ олар оны жеңе алмайды. 600 кәсіпкердің 37-сі небәрі 5 пайыз, сондықтан біз гранттар бойынша өзгерістер енгіздік. Оның орнына бір-екі пайыздан, Атырауда 7 пайызға дейін жеңілдетілген несиелер болады. Бұл әр өңірдің бюджетіне байланысты. Биыл Атырауда 2,5 пайызға дейінгі несие бекітілген жоқ, бірақ жоспарда бар,- деді Н.Жаңабеков.
Министрлік өкілі грант алушылардың саны шектеулі екенін айтты. Егер бұрын оларды бизнес субъектілері әртүрлі салалардан инновациялық жобаларға ала алатын болса, енді гранттар тек әлеуметтік кәсіпкерлерге және «Бір ауыл – бір өнім» жобасына қатысушыларға берілетін болады, қалғандары жеңілдетілген кредиттер ала алады.
-Қазір басқа грант бойынша ережелер қабылданды. Кәсіпкерлер 10 млн теңгеге дейін қайтарымсыз грант ала алады. Оның айырмашылығы — бұл қаражатты тек жабдықты сатып алуға бағыттауға болады, өйткені бұрын шикізатты сатып алуға, өндірісті кеңейтуге және т. б. гранттарды мақсатсыз пайдалану фактілері болған. «Даму» қорынан субсидиялар қалды, 7 пайызы ауылдық жерлерге, 8 пайызы қалада қалды. Кепілдік сомасы өсті. Егер бұрын мемлекеттен 1 млрд теңгеге дейін кепілдік алуға болатын болса, қазір 3,5 млрд теңгеге дейін алуға болады. Қазір микробизнесті шағын, одан кейiн орта бизнеске айналдыру міндеті қойылды. Бұл бағытта бағдарламаларға өзгерістер енгізілуде,- деп мәлім етті Нұрбол Жаңабеков.
Департамент директоры грант алғысы келетін бизнес субъектілерін әлеуметтік кәсіпкерлік саласына және «Бір ауыл – бір өнім» жобасына назар аударуға шақырды. Оның айтуынша, бүгінгі таңда республикалық тізілімде тек 271 әлеуметтік кәсіпкер бар, ал «Бір ауыл – бір өнім» жобасына қатысушылардың саны еліміз бойынша небәрі 60-ты құрайды, яғни мұндағы бизнестің грант алу мүмкіндігі әлдеқайда жоғары.
Айта кетейік, кездесуге министрлік пен облыстық кәсіпкерлік және өнеркәсіп басқармасының өкілінен өздерін қызықтырған сұрақтарға жауап алған 60-тан астам кәсіпкер қатысты. Жиынды Атырау облысының кәсіпкерлік және өнеркәсіп басқармасы Өңірлік кәсіпкерлер палатасымен бірлесіп ұйымдастырды.